As ich "Oad Grathem" sjrief zulle limburgse taalpuriste mich waal aafsjete.
Want volges de sjpelling van "Veldeke" mót det Aod Grathem zeen, woeë ze mich vervolges in 't Luëdal weer väör zooje ophange. Ich probeer d'r mèt weg te kome door Aod Grathem as "Oad Grathem" te sjpelle ómdet det 'ne eige-naam is, en waal van de café woeë 't volgendje gebäördje.
Laes en geneet ....
Dinsdig 20 februari 2007.
Borebroeloft in Baoksem bie café de sjmeed. Traditioneel loup ich op deze aovenj in schotse kleier, inclusief kilt. Same mèt miene ex-adjudant MacManus. De vastelaovendj haet mich väöl plezeer opgeleverdj en weinig geldj gekostj. Dit waas namelijk 't jaor van de "Ode aan Heitse" en de zelfgebrandje cd'tjes verkocht ich vanoet de tes väör 2 consumptiebonne. Ze wore neet aan te sjleipe.
Plotseling huër ich via "d'n aoje Lins" det ze in café "Oad Grathem" in Grathem 't leedje gries höbbe gedreidj. Misjien 'ns belle ? Doon we.
Ich melj mich biej Monique van "Oad Grathem" as "MacBukkum". 't Is efkes sjtil mer den kumtj 't gesjprek al vlot op gang. De aafsjpraok is gauw gemaaktj. Efkes later kumtj Monique mèt 'ne VW Caddy aanzitte. Lache man. MacManus, Wilma, d'n aoje Lins en de gitaar achter in de bak. Ich väör naeve Monique óm 't plan te besjpraeke. Nemes bie "Oad Grathem" wètj get, dus we mótte sjtiekem achteróm. In de käöke waertj de sjpanning opgeveurdj en we aete nog get braodwórste oet de pan. De café is aafgelaje vól en ouch de prins en de raod van de Foekepotters zeen d'r.
De aankondiging sjleit in as 'n bom. Macbukkum himself kumtj de "Ode aan Heitse" live zinge en nog waal as schotse troubadour ... De kroeg sjteit op de kop. Oze mascotte, de gipse kwakkert dae ich oeëts kado höb gekraege van de kwakkerte, waertj op 'n kruk geplaatstj en ichzelf d'r naeve. Ich kan mich neet mieër herinnere wie dök det ich de "Ode" dao gezónge höb, mer ich mós sjtoppe óm "de waever" in Baoksem te kinne haole. Det mook trouwes niks oet, want volges mich höbbe ze dao doorgezónge toet aan de hieëringe.
In 't fieëstgedruus is oze gipse Kwakkert gesjneuveldj, woeëväör mien waalgemèndje excuses. Helaas haai dae knöppel alles gebraoke waat 'r mer te braeke vèltj en hae sjlietj noe vermoedelik zien daag in de voge van de tegelvloer van "Oad Grathem". Waat 'n lot ...
Monique bracht ós, in de Caddy, weer netjes nao Baoksem. Bie de parkeerplaats van de sjmeed zote get jónge in de sjtruuk te sjpele. Waat in Grathem kan, kan hie ouch, dacht ich en we höbbe de "Ode" mèt dae ganse groep nog 'n paar kieër gezónge in de greppel naeve 't sjpaor. Det kippe-vel geveul kumtj trök in "De eindaagsvleeg" op de CD "Klaats !!"
In "Oad Grathem" höb ich later nog 'ns opgetraoje en ich höb nog sjteeds fijn contact mèt Monique. Dit hieël verhaol waas väör mich reje genóg óm 'n leedje te sjrieve äöver de kroeg